Komunikadu Imprensa
Asinatura Akordu Integrál ba Projetu Reabilitasaun Ba Área Estrasaun Fatuk Iha Aldeia Cai Uai Ho’o, Suku Ossú de Cima, Posto Administrativo Ossú, Município Viqueque
Iha loron 7 de Jullu 2021, Autoridade Nacional do Petróleo e Minerais (ANPM) hamutuk ho Ministério das Obras Publika no mos kompañia Uhacae Lda, asina akordu integrál ba projetu reabilitasaun área estrasaun fatuk iha aldeia Cai Uai Ho’o, suku Ossú de Cima, Posto Administrativo Ossú, Município Viqueque.
Akordu refere sei asegura komprimisu hosi kompañia Uhacae Lda hodi reabilita fila-fali área eskavasaun ne’ebé abandona ona iha tinan 2016. Tuir planu reabilitasaun aprovadu, ámbitu hosi atividade reabilitasaun mak sei inklui cut and fill (levelling) hodi asegura slope stability no mos kuda fila-fali ai horis no halo manutensaun ba área minas abandonadu iha períodu fulan ruanulu resin haat nia laran. Hosi parte seluk, materiais restu hosi atividade cut and fill sei utiliza hodi suporta finalizasaun projetu konstrusaun estrada hosi Ministério Obras Públicas iha seksaun STA 5+ 155 to’o seksaun STA 14 00 iha posto administrativo ossú, município viqueque.
Ministério Obras Públika nebe reprezenta hosi Diretór Jerál Obras Públicas Sr. Rui Hernani agradese ba koperasaun hosi parte hotu-hotu hodi realiza akordu ne’e no reafirma pozisaun Ministério Obras Públicas atu suporta implementasaun akordu refere.
Hosi parte autoridade reguladora, Presidente ANPM Sr. Florentino Soares Ferreira akresenta papel importante hosi ANPM nian atu kontinua suporta no fasilita dezenvolvimentu iha Timor-Leste tuir enkuadramentu legál aplikável sira, no sei la sai bareira ba prosesu dezenvolvimentu.
Kompañia Uhacae Lda kompromete atu implementa planu reabilitasaun aprovadu iha sítiu eskavasaun.
Akordu ne’e realiza tamba esforsu konjunta hosi ANPM, Ministério Obras Públicas, kompañia Uhacae Lda no mos ho konsiderasaun ba rekomendasaun-sira ne’ebé mai hosi avaliasaun konjunta entre ANPM ho liñas ministeriál sira seluk hanesan Direção Nacional Conservação da Natureza (DNCN) ne’ebé implementa iha tinan 2019.
